स्वावलम्बन

जन्म त तिमीलाइ आमाबुबाले दिने मात्र हो, जीउन आँफै सक्नु पर्छ ।

जिन्दगीको स्वाद उहाँहरूले चखाइदिने मात्र हो, पीउन आँफै सक्नु पर्छ । ।

बाटो त तिमीलाइ देखाइदिने मात्र हो, हिँड्न आँफै जान्नु पर्छ ।

फल त तिमीलाइ देखाइदिने मात्र हो, टिप्न आँफै जान्नु पर्छ । ।

माछा मार्न सिकाइदिने मात्र अरूले हो, जाल हान्न आँफै जान्नु पर्छ ।

डेग थेग्न सिकाइदिने मात्र अरूले हो, चाल चाल्न आँफै जान्नु पर्छ । ।

अक्षर चिनाइदिने त अरूले हो, ज्ञान आँफै लिन सक्नु पर्छ ।

समाजमा उभ्याइदिने त अरूले हो, मान आँफै कमाउन सक्नु पर्छ । ।

घाउमा मलम लगाइदिने त अरूले हो, चोट आँफै खप्न सक्नु पर्छ ।

काम गर्न लगाइदिने त अरुले हो, नोट आँफै कमाउन सक्नु पर्छ । ।

सुख दु:ख त सबै तिम्रै वरिपरि छन्, चिन्न आँफै जान्न पर्छ ।

राम्रा नराम्रा मान्छे त तिम्रै वरिपरि छन्, छान्न आँफै जान्न पर्छ । ।

सुझाव त अरूले दिने मात्र हो, समाधान आँफै गर्न पर्छ ।

सम्झाइ बुझाइ दिने त अरूले हो, बाधा-व्यवधान पार आँफै गर्न पर्छ ।।

फूलबारीमा त फूल फूल्ने मात्र हो, रस चुम्न मौरी नै सक्षम हुन पर्छ ।

मौरीले महको चाका पार्दिने मात्र हो, काढ्न आँफै नै सक्षम हुन पर्छ । ।

यस्तै छ संसार यहाँ जन्म पाइने मात्र हो, मर्न आँफै पर्छ ।

मृत्यु त प्राकृतिक हो, कालजयी हुन असल काम आँफै गर्नु पर्छ । ।